WULANGAN 2 KELAS 7 CRITA PENGALAMAN (MATERI DAN LATIHAN SOAL)

Wulangan 2

Crita Pengalaman

Crita pengalaman yaiku crita kedadean kang wis tau dideleng/ ditemoni utawa dilakoni dhewe ing saben dinane. Crita pengalaman bisa arupa crita kang sedih, seneng, lucu, nrenyuhake, utawa mrihatinake. Mirengake crita pengalaman ateges nyemak critane wong liya kang critane bisa sedih, seneng, lucu, nrenyuhake utawa mrihatinake. Pengalaman kang dicritakake marang wong liya bisa pengalaman pribadhine dhewe, uga bisa pengalaman kang diduweni wong liya. Sadhengah kadadean kang wis tau dilakoni iku menawa dicritakake bisa nambahi kawruh marang kang ngrungokake.

Crita bab pengalaman marang wong liya iku kudu duweni kaprigelan ing bab micara. Yen bisa crita kanthi apik, wong kang ngrungokake bisa katut ing swasana crita kasebut. Wong kang krungu bisa nangis, ngguyu, mesem, bungah utawa susah. Pengalaman kang dilakoni sepisanan utawa nembe wae kalakon mesthi krasa banget ing ati, apa maneh lelakon iku sedhih. Kaya-kaya ora ilang-ilang saka pikiran lan rasaning ati.

Nyritakake pengalaman sedhih marang wong liya bisa njalari panglipuring ati. Menawa duwe lelakon kang kalebu sedhih lan ngebot-eboti pikir, luwih becik enggal-enggal dicritakake marang sapa kang dianggep cedhak, kayata ibune, bapakne, kakang utawa mbakyu, kanca raket, utawa liyane, amrih nemu rampunge perkara utawa ndadekake ati lega. Kanthi mangkono bisa ngurang-urangi rasa sedhihe, apa maneh sawise diwenehi pitutur kang ngayem-ayemi. Jare kanthi crita bakal ngurangi aboting masalah (perkara) kang nembe dirasakake.

Yen ana wong kang nyritakake pengalaman marang kowe rungokna sing tenan. Pengalaman mau bisa wae dadi tuladha sing becik kanggomu. Tumrap sing nglakoni bisa dijupuk "hikmahe".

Crita pengalaman yaiku crita kang diceritakake marang wong liya bisa pengalamane dhewe, uga bisa uga pengalaman kang diduweni wong liya. Dene pigunane crita pengalaman yaiku:

1. Minangka sarana ngudhar reruweting pikir

2. Nambahi kawruh

3. Minangka piwulang utawa guru kang becik

4. Minangka panglipur

Carane nyritakake pengalaman kanthi tinulis yaiku:

1. Anane tema utawa bakuning crita kang wis tau dilakoni

2. Nemtokake pokok-pokoking crita

3. Mekarake pokoking crita dadi ukara

4. Mekarake ukara dadi paragraph.

5. Ninthingi tulisan kalarasake pamilihing tembung, runtuting ukara, runtuting paragraph, uga tata panulise.

Semaken tuladha crita pengalaman ing ngisor iki!

Wisata ing Guwa Cemara

Wekdal prei unggah-unggahan kelas sampun dumugi. Kula sakulawarga badhe plesir dhateng Guwa Cemara. Jam enem enjing kula sakulawarga sampun tata-tata badhe plesir dhateng pesisir Guwa Cemara. Bapak, ibu kula saha rayi kula sampun nyawisaken samubarang ingkang kabetahaken samangke. Kula mbeta ember kangge madhahi jingking. Saksampunipun sedaya siap kula sakulawarga lajeng bidhal tumuju papan plesiran ing kutha Bantul.

Lampah kula mangidul ing margi Bantul lajeng tumuju margi Srandakan mangilen. Saksampunipun dumugi ing protigan Sapuangin, lampah kula menggok mangidul medal margi tumuju kecamatan Sanden. Senajan mlebet padhusunan nanging marginipun ugi sampun rame. Kathah kendharaan ingkang sami miyos ing mriku menapa malih ing dinten liburan utawi dinten Minggu kathah sanget tiyang-tiyang ingkang sami badhe dhateng pesisir kidul tansaya nambahi ramenipun margi. Sadangunipun ing margi kula ningali sesawangan sakiwa tengen kathah sabin ingkang ketingal ijo royo-royo tanemanipun. 

Boten dangu bapak ngendika menawi sekedhap malih sampun dumugi pesisir Guwa Cemara. Pranyata saestu. Boten ngantos jam-jaman, lampah kula sakulawarga sampun dumugi pesisir Guwa Cemara. Saksampunipun parkir kendharaan, kula, bapak, ibu sarta rayi kula mandhap tumuju ing pinggir segara. Wiwit dugi ati kula menika raosipun bingah sanget. Ing mriku ketingal wit-wit cemara ingkang ngrembuyung jejer tharik-tharik kathah sanget saengga papanipun edhum lan hawanipun seger. Jumeguring alun(ombak) ing wekdal enjing ugi keprungu sora sanget. Kula kaliyan rayi kula sami methukaken alun nanging dipunemutaken bapak lan ibu awit alunipun ageng sanget, pramila kula kedah ngatos-atos. Kula lajeng dolanan wedhi damel punthukan. Punthukan-punthukan menika sami ambyar nalika katerjang toya saking pecahing alun. Sasampunipun damel punthukan wedhi, kula kaliyan rayi kula lajeng pados jingking ingkang mentas kabeta alun. Jingking-jingking wau sami mlayu santer sanget lajeng ngerong saklebeting wedhi. Kula uber ngantos kecepeng lajeng kula wadhahi ember. Boten kraos wekdalipun sampun siyang. Bapak kaliyan ibu nimbali kula kekalih dipunajak wangsul. Kula kaliyan rayi kula lajeng ndherek dhawuhipun bapak kaliyan ibu wangsul nilaraken pesisir Guwa Cemara kanthi raos ingkang lega.

Kawruh Basa

Teges Tembung

Tembung-tembung sawetara saka crita pengalaman ing dhuwur yaiku:

Pinuju              : ngepasi wektu

Sabin               : sawah

ijo royo-royo   : katon ijo seger

ngrembuyung  : ketel, akeh godhonge

edhum             : eyup, ora panas

ngerong           : ndhelik ing jero lemah utawa wedhi

kula uber         : dak uyak, dak goleki

kecepeng         : kecekel

Piwulang budi pekerti saka crita pengalaman kasebut yaiku:

1. Awake dhewe kudu bisa nduweni rasa syukur marang Gusti Kang Maha Kuwasa kang wis nyipta bumi kang sawiji isine segara kang jembar.

2. Awake dhewe kudu bisa njaga lestarine alam aja nganti gawe rusak.

Yen wis rampung anggonmu mahami bahan ajar ing dhuwur, banjur wangsulana pitakon ing ngisor iki!